September en Oktober is die mooiste maande hier in Piketberg, nê?  Ry 'n bietjie rond en besigtig die blomme en struike in ander se tuine.  Maak 'n nota om dié waarvan jy hou te plant (nou gou-gou voor die somerhitte) of volgende Maart voor die winter reën, dan sal jou plekkie volgende jaar net so mooi lyk!
Hier's 'n paar wenke. In die blomtuin:  pluk gereeld blomme en verwyder dooies om die blomtyd te verleng;  plant nou gladiolusse vir blomme met Kersfees;  bemes lentebolle wat nog aktief groei sodat plante goeie bolle maak vir volgende jaar;  enige meerjariges wat nie in die herfs verdeel is nie, kan nou uitgeplant word (versprei die planttye van Michaelmasmadeliefies vir 'n langer blomtyd.  In die roostuin:  rose moet bespuit word vir swamsiektes en bemes word maandeliks met 8:1:5 of 3:1:5.  Nog iets met rose is om die middelste knop van trosse floribunda-blomme uit te knip.  Onthou om  ander bosrose, wanneer hulle blom, om liewers korter stingels af te knip - die bos het soveel blare as moontlik nodig om voedsel te vervaardig.

Begin gerus 'n deklaagprogram om die tuin te help om hoë temperature en warm somerwinde te oorleef.  Oorweeg dit om windskerms op te rig om die tuin te beskerm.

Ons was baie bevoorreg om geskenkpakkies van Josua Children's Mission te ontvang vir al ons kinders van die Kinderbond. Dit is Amerikaanse kinders wat pakkies pak vir kinders in Afrika. Die organisasie daar staan bekend as Samaritan's Purse. Nadat ons 'n bekendstellingsgeleentheid in die Kaap bygewoon het, moes ons al ons kinders se name verskaf en het ons 180 pakkies ontvang. Die liedjie "Ek weet dat Jesus my liefhet, ek weet dat Hy baie van my hou, sommer net soos ek is, want ek's kosbaar en spesiaal vir Hom" het die middag verseker vir elke kind waar geword. 'n Groot dankie aan ons groot Kindervriend, Jesus, wat hierdie middag vir ons en ons kinders moontlik gemaak het.