Op 25 Maart het Praktika 'n Beroepsgesondheids- en Veiligheidsprogram op Citrusdal aangebied.  Volgens die Wet op Beroepsgesondheid en Veiligheid is 'n onderneming wat meer as twintig werknemers in die
werksplek het, verplig om 'n veiligheidsverteenwoordiger te hê. Daar moet ook 'n kopie van die Wet op Beroeps-gesondheid en Veiligheid in elke werksplek wees.  Dit is beskikbaar by die Staatsdrukker of die Praktika-kantoor.
Gedurende die opleiding ontvang elke leerder 'n handboek waarin die volgende modules vervat is: die Wet op Beroepsgesondheid en Veiligheid; die Pligte en Verantwoordelikhede van Werkgewers en Bestuurders; die Pligte en Verantwoordelikhede van Werknemers; die Rol van die Gesondheids- en Veiligheidsverteenwoordiger.
Elke veiligheidsverteenwoordiger kry 'n area in die
werksplek waarvoor hy verantwoordelik is. Binne hierdie area identifiseer hy dan moontlike gevare of risiko's.  Hy moet 'n sensitiwiteit ontwikkel om deurlopend gedurende sy normale dagtaak op die uitkyk te wees vir moontlike risiko's en moet gevaarlike situasies kan raaksien.  Hy moet ook toesien dat daar daadwerklik iets aan gedoen word.
Hy bepaal ook die stappe wat geneem moet word om ongelukke te vermy.  Hy moet hierdie stappe daagliks monitor en dringende sake by die bestuur aanmeld.
Die opleiding van veiligheidsverteenwoordigers maak sommer gou 'n verskil in die werksplek en kan die onderneming baie pyn en trauma spaar in die voorkoming van ongelukke.